本期內容簡介
 
編輯个話
 
《文學客家》第30 期用「月有情：秋詩篇篇」做專題，刊出同月光相關聯想个客語詩篇，承蒙長期投稿个客語作家江昀先生、彭歲玲先生、馮輝岳先生、黃永達教授、張美煜教授、徐貴榮教授、邱湘雲教授等等本刊个大力支持者參與者，乜有教客語課程个先生，練習用客話寫作像徐秀英先生、許瑞琴先生，呈現客話多方面感動人个詩情。
 
本期發表个作品，除了專題个月有情各篇詩作，還有多面向个作品，像邱一帆政治議題詩个詩三首〈中正廟个信徒〉、後生詩人徐碧美个〈遽遽下課〉，網路客語詩人陳美燕个〈阿婆系列〉三首，內容從生活中取材，當有新意！臺東學生个詩畫作品，緊來緊有創意，在發行專輯準備過程，還係繼續在本刊發表，實在還感謝。
 
散文各篇有逃學个〈逃學狗摎武秀才〉(張捷明)、食个〈煙腸〉(黃美貞)、〈煮食比賽〉(逩地龍)、〈講煮食，想阿姆〉(張美煜)，還有繼續上期去北疆遊尞个圖文筆記〈老李北疆和番記--下齣〉(李源發)，幽默好笑个〈魚湯〉、講古个〈細人仔普〉係筆會知音曾俊鑾先生个來稿，也有桂貞阿姊愁慮妹仔毋嫁人个小說、王興寶个短劇、羅伯个隨筆形式个評論，做得講有緊來緊多彩豐富个作品。
 
下一期截稿日期係11 月10 日，歡迎大家繼續來投客語文！