本期內容簡介

編輯个話

各位朋友，有看著月光映照大地無？這季當當係大手牽細手，共下行客語寫作个好時光！《文學客家》第 38 期用「月光光-2019 台灣客語文學營創作成果展」做專題，真心感謝客家筆會第一屆客語文學創作班學員踴躍來參與。

專題中除了創作班學員个 15 篇散文值得共賞以外，有徐春生个主題詩〈月光光 照蓮塘〉，還有苗栗記者會員林錫霞个〈客家好時光〉，文學印象鮮明。文學个本質係真善美个追求，客語寫作仰仔在這講究多元價值个社會增添文學技巧，愛仰仔隱微、委婉、彎斡，應該也係當多讀者同會員个想望。本刊將該日最登真个三位先輩評審作家邱一帆先生、馮輝岳先生、邱湘雲教授在成果展覽兼文學旅行个口頭講評，過再用客語書面整理，分大家加深印象，將客語書面文類擴展到評論个層次。同時乜在〈有影有跡〉單元，邀請著傳播界金鐘獎常勝軍鍾麗香寫〈「2019 台灣客語文學營」紀實〉這篇，報導相關活動。

承蒙王興寶、左春香、徐貴榮、羅秀玲、胡明華、徐儀錦、黃有富、涂瑞儀、二馬、徐秀英、鍾又禎提供詩作；張捷明、黃美貞、張瑞珍、陳文姬、陳笑一、邱春英、小草提供散文；黃火廷个〈情殘夢碎〉係客語小說，一貫用厥真真假假，笑笑㖸㖸个方式，鋪排一場唱歌仔比賽場景，講這兩位女主角个愛情同婚姻个故事，盡餳人讀。

用客話寫𠊎等个文學係最靚个追求，大家共下來寫，更靚！