本期內容簡介
 
編輯个話
 
今年開春過後，武漢肺炎(新冠狀病毒)來襲，台灣各地展開防疫措施，封鎖了經濟、交通、旅遊事務，各種藝文活動乜停辦，到6 月1 日正愛定定仔來開放。防疫新生活，《文學客家》第41 期用「客韻茶香—2020 客家詩歌節」做專題，來迎接端陽佳節，祝福本刊讀者作者康健度過劫難，平安又順利！
 
這期專題係用「茶」做主題描寫个詩歌作品，有馮輝岳先生个〈捉茶蠶摎賣茶〉、江昀先生个〈酸柑茶〉、邱一帆先生个〈做茶〉三部曲、王興寶先生个〈茶香客家禪〉、湘子先生个〈清茶人生〉、余惠蓮先生个〈尋著歸鄉个路〉、彭心怡先生个〈人生个茶味―摎吾爸泡茶个該兜日仔〉、李碧珠先生个〈茶香情〉、徐儀錦先生个〈茶香/ 鄉情〉，老中青三代詩人，共下呈現茶文化个意念，親情、鄉情、愛情融合到裡肚，還有對生命个感嘆…，讀起來特別有人情運命个味緒。
 
盡承蒙張美煜、賴漢生、莊家冀、黃一容恁多先進提供新詩作品，還有涂瑞儀先生个〈烏陰天个好日仔〉、曾鳳嬌先生个〈八仙傳說〉、徐貴榮先生个〈姐婆个銅鑼灣〉散文故事、曾俊鑾先生个小說〈乾生做爐主〉、邱湘雲先生个客語茶詩評論，用盡有意思个文學表現形式，加添本期豐富个內容。
 
這期「小說欣賞」係新設个一個專欄，紹介黃火廷先生个鄉土小說，分享故人故土生活个蹤跡。台灣疫情過後，文藝活動緊來緊開放，希望客語文學書寫推廣這條路，大家做得牽手共下行！