本期內容簡介

編輯个話

2021 年个收冬，全球疫情吂平復，客語書寫細路項，𠊎等還係定定仔緊行。這47 期《文學客家》就用「敬禾得穀 敬老得福」做專題，來同大家分享「耕耘」个酸甜苦辣摎「老」有關个生活經驗。除了有一帆先生个〈時節，禾榖〉、菊英先生〈一粒米 百粒汗〉以外，還有春英先生〈重陽十首〉、秀鳳先生〈阿婆先生〉、瑞珍先生〈洗身〉、笑一先生〈擔輸贏〉，大家做得跈等時節鼻著穀香飯香，乜做得讀著「敬老」个味緒。
這擺〈有影有跡〉係胡紅波教授近五十年前呼應台灣文學之母鍾肇政大老《插天山之歌》小說場景有關「木馬」所寫个種種，有圖有客文，還有報紙剪影，當有研究價值。
新詩作品有大手牽細手，承蒙阿寶、江昀、阿熱姐、胡明華、黃有富、哈可星、葉玉嬌、蕭宥、言安倫、李秀琴等人提供，有自由多元个呈現。散文部分也當看得，感謝馮輝岳先生、阿達教授、志寧校長、惠蓮先生、洪文先生、麗芬、秋蓮、詠加等朋友書寫各種有感个題材；散文欣賞收錄本刊資深編輯黃秋枝新出爐得獎作品〈疫情時節 講「發」字〉，筆會同仁大家感受著「與有榮焉」个光彩。
長篇个部份，〈故事〉2 篇，由曾鳳嬌、鄧文政兩位先生從台灣民間傳說摎日本鄉野故事著手，感嘆摎機智並陳，乜當有趣味。這擺還有曾秋仁提供〈劇本--大戆牯〉1 篇，溫和感動人，有黃子堯个經典客語詩杜潘芳格〈平安戲〉个賞析。
多謝大家賜稿！恁仔細！承蒙！