本期內容簡介

創刊詞
大家來用客話寫文學
屬於客語文學个刊物《文學客家》第一期就愛面世，這係一種追尋也係一種堅持。從客話到文字，從文字到客語文學，從客語文學到客家文學，這係一種追尋，過程之中定著會堵著當多个問題，要看等問題，打合解決个辦法，這係一路行下去个文學工作者愛有个堅持。
語言文化係族群个命脈，只有客家人个語言文化繼續傳揚，就毋使驚無題材，客語文學个創作正有其材料、養分，也正做得延續、創造新生命，客語詩人作家，對客家語言文化个傳承有責任也有其使命感。只愛客家人个語言文化延續傳揚，客語文學創作个題材只有愈來愈多、愈來愈大。
客家文化有其特殊个、同其他族群文化無共樣个所在，各地个客家人也可能有無共樣个文化特色，詩人、寫作者假使做得看著這點、看出背後較深个意義，用豐富个聯想、邏輯聯繫个能力，表現具體鮮活个形象，該就係本色个客語文學意象、客家文學，當然，豐富个客家經驗對客語文學个創作儘重要。
客家語言文化當然有其變遷性，仰般來捉著變遷个樣貌，分佢一種時代个意義，搭配親切、生動个形象刻畫，係現代客語詩人、寫作者愛努力个方向，文學毋好變做道德說教，也無應該變做文字个遊戲。意象个經營、就係美感个經營，係所有文學个生命，客語文學共樣係恁樣。
意義同具體形象之間，仰般聯結成合理、邏輯、生動、鮮活个意象，係詩人作家一生人个追求；寫出意象、寫出美感，創作出感動自家、感動客家又感動大家个客語文學作品，係客語詩人、寫作者堅持个動力同價值。
客語文學創作係客家文學創作个一部份，也做得講係目前當重要个部分，因為客語文學个創作做得同客話從生活語言提升到文學語言个高度，同時真確融入客家元素。透過客家元素這兜具體个存在，同其用客話表現出來，做得永久保存客家文化个元素，又做得創造客家文化个新意義。
做為一個客家寫作者，做得捉著族群文化背後个意義，不管係傳統个、特殊个、轉變中个、抑係單一个客家元素，調整具體个形象，背後深層意義之間个關係，凸顯客家文學个意象，同時也做得體現出客家傳統个、特殊个、轉變中个抑係單一个文化現象。
用較闊个角度來看，使用客話來寫作文學，就溝通了客家文化同客家文學个關係，因為客話本身就係客家文化个重要元素，假使做得看著具體个客家文化現象，看透現象背後深層个意義，用具體、形象活潑个形式表現出來，恁樣就體現了客家文學个意象，同時也表現了客家文化个意象。
故所，請大家用客話來寫，寫出優秀个台灣客家文學！