本期內容簡介

編輯个話
辛卯年个四月春天，毋知你有感受到柔柔細風吹過面前个鬆爽無？靚靚風景摎大地生命个活潑，敢有分你勾出、愐起深深囥在心肚个客家情？《文學客家》專刊第四期愛用「囥入心肚个深深客家情」，做主題來出刊。
本期採選李宥琳个文章〈靚靚花布摎客家細妹〉，就像鬧熱春天个客家花布，好看又實用；張淑玲〈補天穿〉達傳出客家族群特有个幸福故事；陳笑阿芳香馩馩个〈東坡肉〉，毋知會餳出異多客家鄉親對傳統美食个感情；宋彩仙个〈豬菜〉乜共樣會勾出只有在客家庄正特有个好味緒；毋過苦甘苦甘个〈豬膽肝〉嗄分陳寧貴愐起還細時節，對過年另外一種个感情摎記憶；係詩乜係歌个〈桐花三唱〉，楊政道希望大家做得像春天正發出个細芽，用自己个聲音唱出心肚最深个感情；黃永達个詩歌〈台灣客庄「月有情」〉一樣，傳達出歸年臺灣客庄各地，分人感動个深情。

故所以，逐擺个文章投稿、選文方面，會安排一个專題，做得分出版刊物達到豐富客家个鄉土風情，增加多樣个文學風采； 乜鼓勵對客家文學寫作有興趣个鄉親、朋友，多提供客家詩歌、散文、小說、戲劇、童謠、兒歌、童話、評論、藝文活動、出版報導等方面个作品。
本刊以季刊个方式出版、發行，逐期个截稿日期係毎2月、5月、8月、11月20日。歡迎所有認同客語文學創作个人來寫作、投稿摎閱讀，乜盡歡迎四方各界來贊助，大家共同對客家文學寫作，可以繼續支持摎推廣。