本期內容簡介

編輯个話
一擺又一擺个寒流，毋知有分你凍著起雞嫲皮、冷到緊顫無？在天時漸漸變寒个時節，其實可以毋使在外背跋上跋下、飆來碰去，做得坐在屋肚个膨凳項，啉一杯燒熝熝个釅茶抑係香馩馩个咖啡，享受看書个生活樂趣，就像《文學客家》專刊第七期愛用「燒暖情，過寒冬」做主題，邀請大家在寒冬天時，來讀文章裡肚燒燒暖暖个親情、友情摎愛情个幸福。
本期在黃秋枝个「神茶」讀得到對伯公个誠心；孫五妹「阿姊」摎姜鳳珠「發譴个胎神」寫出分人感動个親情；利玉芳「恁久好無」摎江昀「搬屋」兩篇可貴个友情，在現實、功利个社會中，分人大大个燒暖；邱一帆藉「老人家个路」表現對桐花个特殊感情；還有黃永達「轉山前、去後山--台北車頭無出站」，用現代來對照頭擺分人懷念个家族人情，這種燒暖，就像係在寒冬時節，啉一杯無可代替、溫暖人心个幸福。

故所以，逐擺个文章投稿、選文方面，編輯會安排一个專題，做得分出版刊物，達到豐富客家个鄉土風情，增加多樣个文學風采；乜鼓勵對客家文學寫作有興趣个鄉親、朋友，多提供客家詩歌、散文、小說、戲劇、童謠、兒歌、童話、評論、藝文活動、出版報導等方面个作品。
本刊以季刊个方式出版、發行，下一期个截稿日期係2月20日。歡迎所有認同客語文學創作个人來寫作、投稿摎閱讀，乜盡歡迎四方各界來贊助，大家共同對客家文學寫作，可以繼續支持摎推廣。