本期內容簡介

編輯个話

《文學客家》第50 期編輯完稿，2022 年9 月就愛出版，這本客語雜誌既經發行50 期，詩文成果希望分大家看得著！為著愛鼓勵客語兒童文學創作，發表創新形式同內容个作品，今年在疫情繃緪之下賡續辦理客家兒童文學創作獎，承蒙各界支持，這50 期《文學客家》就用「2022 客家兒童文學創作獎得獎作品集」做專題，來同大家分享優勝作品！
這期專題〈2022 客家兒童文學創作獎得獎作品集〉，有詩歌、童話兩類，各分做學生組、成人組，總共收著127 件作品，通過評審過後，公布了得獎名單，大家在網路頂項分享得獎个歡喜同客語創作个認同感，正經當感動。真希望這恁多股創新个能量，做得延續客語兒童文學寫作个一條命脈。
承蒙胡明華、黃有富、哈可星、王興寶、江昀提供新詩作品，林錫霞、詠加、徐佳妤、余惠蓮个散文作品，做得分讀者深入欣賞客語詩文个文藝美學。
長篇个部份，有〈小說〉1 篇〈金鳳〉係許倩雯个短篇小說，講客家女性个一種生命故事，人妻/人母个悲劇情節，引起盡多艱苦人生个感嘆。〈故事〉1 篇，曾鳳嬌、客人講古團隊從不同社會層面來講人生、福蔭子孫个古，當有趣味。
承蒙大家來稿相添，𢯭手開拓客語書寫个版圖，分《文學客家》緊來緊豐富！